Canto dei Sanfedisti

A lu suono d'a grancascia
viva viva la gente bascia
A lu suono d'e tamburrielli
so' risorte 'e puverielli
A lu suono d'e campane
viva viva li pupulane
A lu suono d'e viuline
mitt'a morte li Giacubbine.
Sona sona
sona Carmagnola
sona li cunsiglia
viva 'o rre cu la Famiglia.
A sant'Eremo tanto forte
l'hanno fatto comm'a ricotta
A 'stu curnuto sbrevognato
l'hanno mis'a mitria 'ncapa
Maistà chi t'ha traduto?
chistu stommaco chi ha avuto?
'e signure, 'e cavaliere
te vulevano priggiuniere.
Sona sona
sona Carmagnola
sona li cunsiglia
viva 'o rre cu la Famiglia.

Alli tridece de giugno
sant'Antonio gluriuso
'E signure, 'sti birbante
'e facettero 'o mazzo tante
So' venute li Francise
aute tasse n'ci hanno mise
Liberté... Egalité...
tu arruobbe a me
io arruobbo a te.
Sona sona
sona Carmagnola
sona li cunsiglia
viva 'o rre cu la Famiglia.

Li Francise so' arrivate
ci hanno bbuono carusate
E vualà e vualà
cavece 'n culo alla libbertà
A lu ponte d'a Maddalena
'onna Luisa è asciuta prena
e tre miedece che banno
nun la ponno fa' sgravà.
Sona sona
sona Carmagnola
sona li cunsiglia
viva 'o rre cu la Famiglia.

A lu muolo senza guerra
se tiraie l'albero n' terra
afferraino 'e giacubbine
'e facettero 'na mappina.
È fernuta l'uguaglianza
è fernuta la libertà
pe 'vuie so' dulure e panza
signò iateve a cuccà.
Sona sona
sona Carmagnola
sona li cunsiglia
viva 'o rre cu la Famiglia.

Passaie lu mese chiuvuso
lu ventuso e l'addiruso
a lu mese ca se mete
hanno avuto l'aglio arrete
Viva tata maccarone
ca rispetta la religgione
Giacubbine iate a mare
ch' v'abbrucia lu panare.
Sona sona
sona Carmagnola
sona li cunsiglia
viva o rre cu la Famiglia.